Работници во заштитни одела пренесуваат буриња со отровен линдан од малата депонија, во кругот на поранешната хемиска фабрика ОХИС. Вака изгледаа подготовките за денешниот транспорт во Германија и Франција на контаминираната почва со линдан, кој од пред 2 години од „ОХИС“ го чисти грчката компанија Полиеко. До сега е исчистен и транспортиран линданот од првиот и вториот лот на малата депонија, а од денеска во контејнери се товари за транспорт, почва загадена со линдан од третиот лот и дел од четвртиот, вели директорот на Државниот инспекторат за животна средина.
- Денеска е планирано да се товарат 63 тони од почва контаминирана со изомери на HCH и 120 тони HCH отпад од 4 лот. Транспортот ќе се изврши во Франција и во Германија, вели Сретен Стојковски, директор на Државниот инспекторат за животна средина.
Почвата со линдан во Германија ќе се рециклира преку индиректна термална апсорпција и ќе се исчисти , а линданот ќе се носи на согорување во фабрика во Франција, вели Стојковски. Од 2022 година до сега се исчистени првиот, вториот, третиот и дел од четвртиот лот од малата депонија , во која се проценува дека имало вкупно 6600 тони контаминиран отпад. Од 4 лот остануваат за чистење околу 450 тони линдан и 250 тони почва. Откако тој целосно ќе се исчисти, дополнително ќе се определи количината од 5 лот. Но, остануваат и 53 000 тони отпад од големата депонија, за која за сега нема пари за чистење, а потребни се 80 до 100 милиони евра.
- Ние дефакто немаме пари ни за малата депонија да ја довршиме. Проценките се дека за петтиот лот ќе бидат потребни уште 7 милиони евра. До сега се ангажирани околу 10, 2-3 милиони евра за чистење на овие 4 лота. Значи потребни се дополнителни над 7 милиони евра за да се доврши малата депонија, вели директорот Стојковски.
Линдан е откриен и во месноста Пеленица над Драчево. Депонијата е симболично заградена, за да не дојде со неа во контакт живиот свет. Според спроведените анализи од Министерството за животна средина, таму има околу 40 000 тони загадена почва со линдан и отпад од „ Стаклара“. А, за чистење се потребни до 100 милиони евра.
Сотир Трајков