17 дена пред официјалниот старт на кампањата, кандидатите за претседатели и партиите што ги поддржуваат бараат аргументи за оцрнување на конкурентите.
Централна тема меѓу ДУИ и „Вреди“ е кој е проевропски ориентиран, а кој проруски или просрпски. ДУИ предупреди дека опозицискиот блок подготвува руско сценарио по 8 мај кое има цел да предизвика политички немири. Повикува на кампања во согласност со европските и демократските вредности наместо обвинувања, клевети и навреди за првите луѓе на партијата и за кандидатот Бујар Османи.
За противкандидатот Арбен Таравари, ова се нелогични изјави и покажуваат нервоза бидејќи ДУИ ќе ги изгуби изборите.
Техничкиот премиер Џафери ги квалификува овие изјави како политички и очекува, доколку има потреба, реакција од институциите.
За Стево Пендаровски и Гордана Силјановска-Давкова секојдневна дебата водат партиите. ВМРО-ДПМНЕ го обвини Стево Пендаровски дека користи службен автомобил за да се појави на партиски настан.
СДСМ ја обвини Гордана Силјановска-Давкова дека ги навредува пензионерите и дека е само уште едно лице на ВМРО-ДПМНЕ.
Стевчо Јакимовски однесе 11 илјади 648 потписи од своите поддржувачи во ДИК. Уверен е дека ќе влезе во вториот круг.
Кандидатурите за претседателските избори треба да се достават до ДИК до утре на полноќ. По проверката, а најдоцна до 28 март ДИК ќе закаже жребање за редоследот на листите на гласачкото ливче. Кампањата почнува на 4 април.
Соња Николовска