Расте бројот на загинати во шумските пожари кои беснеат на Медитеранот. Огнената стихија која ги зафати Алжир, Грција и Италија до сега одзеде над 40 човечки животи.
Најмногу загинати има во Алжир, каде меѓу 34-те жртви има и 10 војници кои загинале опкружени од оган за време на евакуацијата во крајбрежната провинција Беџаја.
Алармантна е ситуацијата и на грчкиот остров Родос кој е ставен во вонредна состојба. Грчкото министерство за цивилна заштита предупреди на „екстремна опасност“ од пожар во шест од 13-те региони во земјата со оглед дека температурите од над 44 степени целзиусови но и ветрот дополнително ја усложнуваат работата на пожарникарите.
Локалните жители на островите Крф и Родос пак кои беа погодени од огнената катаклизма се борат со последиците. Сопственикот на штала на Родос, Димитрис Зарарис, раскажува дека неговиот живот е уништен откако пламените јазици го пеплосаа добитокот и објектот кој ги имал, бизнис во кој го вложил цел свој живот.
Прво го загубив животот. Не ми е гајле за парите, мојот живот. Затоа што тука беше мојот живот. Јас живеам овде. А сега, немаме ништо. Плачев кога го видов прв пат. Не можев да престанам, плачев. Јас не сум единствениот, раскажува фармерот Димитрис Зарарис.
Но со ваква приказна не е само Зарарис, истата судбина ја делат и останатите жители но и хотелиерите кои стравуваат дека ова ќе биде пропадната сезона со оглед дека главниот приход во овие населени места е туризмот.
Немаме посетители и затоа ќе бидеме затворени, така што тоа е нешто со сто се соочуваме сите ние во моментов и е заедничко, раскажува Апостолос Карагианис, директор за човечки ресурси, Линдос Хотелс Груп.
Ова е катастрофа. Бидејќи главно, главниот приход на овој остров е туризмот. Ако сега имаме откажувања и луѓе кои не сакаат да ги посетат затоа што се исплашени, тоа ќе биде катастрофа за овој остров. За секој грчки остров, вели Василис Софицис, бизнисмен од Крф.
Пожари беснеат и на Сицилија и Пуља, а илјадници жители и туристи се принудени да бегаат. Пожарникарите се борат во многу области да го изгаснат огнот и да спречат создавање нови жаришта. Два големи пожари на почетокот од неделава избија и во Хрватска, а пожарникарите се бореа со пламенотите јазици кои се шират во близина на градот Дубровник
Нашиот проблем е многу силен ветер. Очекуваме да дојдат авиони на Канадери, вели еден од хрватските пожарникари.
Огнот се широ кон соседна Босна и Херцеговина. Предизвикот да биде угасен е многу голем со оглед дека на местата кои се опфатени од пожарот се слушаа детонации од неексплодирани мини остатоци од „Татковинската војна“.
Александар Петрески