Четири искусни медицински сестри набркани од работа само затоа што се Македонки. Во Здравствениот дом во Куманово распишан оглас за вработување на 10 медицински сестри на неопределено. Локалните СДСМ и ДУИ се договориле 6 вработувања да бидат нови од ДУИ, а 4 од СДСМ, кои веќе 4 години работеле таму по договор.
Ова денеска го објави опозициската ВМРО – ДПМНЕ. Од партијата обвинуваат дека директорот, поставен од ДУИ си ги вработува сите 10 партиски членови, а според извори на партијата, тоа го сторил со поделени 10 веќе решени тестови на тестирање, затоа што сметал дека сите 10 вработени треба да се Албанки.
– По овој настан, претседателот на ОО на СДС Тушевски доблесно си дал оставка, а пратеникот Костовски се крие и никаде го нема, велат од ВМРО – ДПМНЕ.
Додаваат дека сега нови и неискусни медицински сестри ќе ги вакцинираат децата и ќе вршат домашна посета, додека искусните ќе седат дома без работа, само затоа што не се од ДУИ.
Од ВМРО – ДПМНЕ ги повикаа надлежните институции да го испитаат случајот, да се поништи огласот и да се вработат стручни, квалитетни и искусни медицински сестри во Здравствениот дом Куманово.