Кога сите се во опозицијата, се борат за поголемо ниво на фискална и финансиска децентрализација, кога ќе дојдат на власт, се спротивни на претходните убедувања. Таков беше случајот и со ВМРО-ДПМНЕ, тоа беше случај и со некои мои партиски другари, изјави Максим Димитриевски, градоначалник на Куманово, во вечерашното издание на „Вин Вин“ на Телма ТВ.
„Дел од нив беа носители на високи локани функции, потоа станаа носители на големи политички, државни функции. Куманово е најголема општина. Кумановци, по глава на жител на дневна основа за локалната самоуправа да функционира, имаат нешто помалку од 60 дена. Преведено во пари, тоа се 100.000 евра дневно да функционира образование, социјална заштита, детски градинки, старечки домови, значи сите пренесени надлежности. На Куманово му е потребно 250 милиони евра да ја среди подземната инфраструктура, да изгради фекална, атмосферска канализација во урбаните и дел од урбано-руралните средини и да обезбеди мрежа за водоснабдување во сите делови на приградските населби и поголемите села. Тоа значи дека ни се потребни пари за сериозно да се развиваме, но, бидејќи ги немаме, според мојата груба пресметка, наредните 20 буџети на општината исклучиво во изградба на фекална и атмосферска канализација, а да заборавиме на се останато“, рече Димитриевски.