Доказите се собрани и пет лица се под истрага за силување на малолетничка и снимање порнографски материјал. Повеќе од една година траела тортурата, а сѐ започнало со мобилен телефон во рака. Апликацијата Инстаграм е местото каде што првоосмоничениот, 25 годишен велешанец, разменувал пораки и ја стекнал довербата на 14 годишната жртва.
Комуникацијата траела повеќе недели и била интензивна – со што жртвата веќе била доведена во заблуда дека ќе започне љубовна врска со момчето. Уште на првата средба бил направен порнографски материјал кој потоа бил користен како закана и се присилувало девојчето да доаѓа на други средби – или ќе се појави или сите ќе го видат снимениот материјал од претходно.
„Првоосомничениот го принудувал детето – жртва во повеќе наврати да оди во станови што биле изнајмувани на повеќе локации во Велес. На средбите присуствувале осомничени и други машки лица, кои прво конзумирале наркотична дрога и алкохолни пијалоци, па во таква состојба вршеле полови дејствија врз жртвата и користеле сексуални услуги, иако знаеле дека малолетното дете е жртва на трговија со луѓе“, велат од Основно јавно обвинителство.
Сторителите се на возраст од 25 до 32 години, четворица од нив од ист град – Велес, а еден од Тетово. По наредба на велешкиот суд, извршен е претрес во дом и други простории кај осомничениот кој го изготвувал порнографскиот материјал. За четворица од осомничените е одреден затворски притвор, а еден доби куќен притвор. Одделот за сузбивање на организиран криминал во МВР поднел кривична до ОЈО за гонење на организиран криминал и корупција, за сторено кривично дело „трговија со дете“. За вакво дело е предвидена затворска казна од најмалку 8 години според Кривичниот законик.
Петар Догов