Српскиот амбасадор во Мароко. Иван Бауер вчера „симболично“ пливаше по крст за Богојавление. Веста беше првично објавена на официјалниот профил на институцијата, за набрзо потоа, поради негативни коментари, да биде избришана.
На фотографиите не може да се види дали Бауер имал конкуренција, но допливал прв до крстот.
На официјалниот налог на амбасадата на социјалните мрежи, но и на неговиот приватен профил, е наведено дека температурата на водата била 16 степени. Твитот набрзо беше избришан, но информацијата не мина незабележана од корисниците на социјалните мрежи.
„Амбасадорот на Република Србија во Кралството Мароко, Иван Бауер присуствуваше во Руската православна црква во Рабат, на служба по повод Богојавление. Потоа, амбасадорот Иван Бауер симболично пливаше за светиот крст. П.С. Температурата на водата е 16 степени“, пишуваше во објавата на Твитер.
Бауер е назначен за српски амбасадор во Мароко во јули во 2021 година, како кадар на партијата СДПС на чело со Расим Љаиќ. Исто така е поранешен телевизиски водител и поранешен пратеник на Социјалдемократската партија на Србија. Беше водител на популарниот квиз „Музичка сложувалка“, а потоа и на квизот „Сам против сите“. Од 2008 година, како што објавија српските медиуми, е вработен на Факултетот економија, финансии и администрација.