Огнот кој започнал да гори на непристапен терен во Националниот парк Шар Планина, од мал оган на едно место, заедно со ветрот се засилил и продолжил да се шири со голема брзина на сите четири страни. Отежната околност во гаснење на пожарот е тоа што нема пат до локацијата и мора да се пешачи околу 2 километра.
Вработените од паркот постојано се на терен и се обидуваат да го локализираат пожарот во деловите кои се достапни, но сами не можат да се справат со пожарот и бараат помош.
Надлежните од центарот за управување со кризи смируваат дека пожарот не може да се спушти ниско долу или да направи голема штета. Но, апелираат дека, сепак, ќе се најде начин за пожарот да биде изгасен.
Од дирекцијата за заштита и спасување велат авион за гаснење на пожар бил на локацијата, но пожарот, сепак, не е локализиран. По проценка на пилотот немало услови за повторен прелет и во моментов нема друга можност за да се излезе во пресрет.
Веќе втор ден како е активен пожарот во Општина Теарце. Во текот на вчерашниот увид, е констатирано дека била опожарена површина од околу 5-6 хектари од што дел била букова шума, а дел биле пасишта и папрат. На истата површина пред 4-5 години имало пожар и како последица на него има голем број паднати дрвја што сега горат.
Тамара Марковска