РЕК Битола од вчера работи само со еден блок. Блок 2 од вчера е исклучен од мрежата, потврдија извори за Телма, но од државната компанија ниту вчера, ниту денеска нема официјална информација на што се должи исклучувањето, односно дали станува збор за испад или ремонт.
Според официјалните информации од Владата, вчера термолекетраните, односно РЕК Битола произвела 5.637 мегават часови струја, додека хидроелектраните и Ветерниот парк Богданци произвеле 6.205 мегавати часови струја. За да ги задоволи потребите на домашниот регулиран пазар, вчера се купени 4.580 мегават часови струја за кои се потрошени над 800.000 евра.
За првите четири дена од декември, ЕСМ ќе потроши околу шест милиони евра за набавка на над 15.000 мегават часови електрична енергија. На сајтот на ЕСМ повторно ги нема објавите за новата набавка. Последната објава е од 27 ноември.
ТЕЦ Осломеј и ТЕЦ Неготино и покрај најавите сè уште не се во функција.