Притисок и можност за политичко влијание, вака Комисијата за спречување и заштита од дискриминација го оцени присуството на бугарскиот конзул во Битола, при вчерашниот увид во просториите на Културниот центар Иван Михајлов. Во соопштението испратено до медиумите, наведуваат дека за ова е известено и македонското Министерство за надворешени работи и бараат соодевтна реакција.
При увидот, спротивно на досегашните практики, констатирано е дека освен претставниците на Здружението, присуствуваше и генералниот конзул на Република Бугарија, г-нот Димитар Иванов. Неговото присуство за време на извршувањето на своите законски надлежности, Комисијата го доживува како обид за влијание врз работата на ова независно тело за еднаквост, но и можност за инструментализација на Комисијата во политички цели, за што го извести и МНР,“ се наведува во соопштението од Комисијата за спречување и заштита од дискриминација, велат од КСЗД.
Од Комисијата додаваат дека се избрани од македонското Собрание и за својата работа одговараат единствено пред оваа институција. Телма очекува одговор од МНР дали ќе има протестна нота за овој дипломатски скандал.
Комисијата вчера изврши увид во просториите на бугарскиот клуб во Битола по претставка поднесена од друго граѓанско здружение за дискриминација по основ на национална и етничка припадност, но, претседателката Весна Бендевска не откри детали додека трае постапката. Отворањето на бугарско здружение на среде Битола со името на близок соработник на фашистите ги разгневи битолчани, а реакциите беа големи и за ентериерот, каде покрај неколкуте портрети на Ванчо Михајлов, врамен е и цитат кој ја негира македонската нација.
Емилија Мисирлиевска