Собранието на Република Северна Македонија денеска ќе одржи продолженија на 50-та и на 57-та седница.
На дневниот ред на 50-та седница, според информациите од веб-страницата на Собранието, преостанати се неколку точки и тоа Предлог стратегијата за родова еднаквост 2021-2026, Предлог законот за изменување и дополнување на Законот за иновациска дејност, Предлог законот за лекови, Предлог законот за парничната постапка и Предлог на закон за исплата на паричен надоместок на жртви од кривични дела со насилство.
По завршувањето на 50-та Собранието треба да продолжи со работа по 57-та седница на која треба да се разгледаат Предлог на закон за изменување и дополнување на Законот за данокот на додадена вредност, по скратена постапка и Предлог на закон за дополнување на Законот за репродуктивен материјал од шумски видови дрвја.
Исто така во Собранието на Република Северна Македонија денеска седница ќе одржи Комисијата за финансирање и буџет на која на дневен ред е Годишниот извештај за извршените ревизии и за работата на Државниот завод за ревизија (ДЗР) за 2021 година.
Пред членовите на оваа Комисија ќе се најде и Годишниот извештај за работењето на Агенцијата за супервизија на осигурување (АСО) за 2021 година, Годишниот извештај на Агенцијата за супервизија на осигурување за состојбата и движењата на осигурителниот пазар во 2021 година, како и Финансиските извештаи на Агенцијата за супервизија на осигурување во 2021 година.