По спроведена истражна постапка, Основното јавно обвинителство Скопје денеска поднесе Обвинителен акт против три лица за кривично дело – Убиство од член 123 став 1 во врска со член 22 од Кривичниот законик.
Според законот за вака квалификувано убиство е предвидена минимална казна од минимум 5 години затвор, додека максималната не е предвидена и може да биде до доживотен затвор.
Обвинетите, две момчиња и една девојка на 7 април, пред ноќен клуб во Градскиот парк во Скопје, заеднички го лишиле од живот оштетениот Денис Тот.
По кратка расправија, сите тројца му нанеле повеќе удари и тешки телесни повреди од кои кај оштетениот најпрвин настанала коматозна состојба, а следниот ден починал.
Надлежниот јавен обвинител до Основниот кривичен суд Скопје достави и предлог за продолжување на мерката притвор за тројцата обвинети, бидејќи се уште постојат околностите поради кои таа мерка им беше определена во текот на истрагата.
Хрватскиот ракометар Тот настапуваше за Металург, а првичните информации беше дека не бил хоспитализиран поради насилни повреди. Дури откако почина во болница без да се разбуди од кома, властите почнаа истрага и утврдија дека станува збор за убиство.
За време на претепувањето пред дискотека без лиценца во скопскиот парк, околу сцената на убиството стојат десетина луѓе и никој не презема ништо за да го прекине трагичниот инцидент.