Британскиот премиер Риши Сунак најави дека ќе издвои дополнителни 10 милијарди фунти за долгорочно финансирање на производството на вооружување. Во тој контекст, додаде дека британската одбранбена индустрија ќе ја „постави на воени нозе“ поради војната во Украина.
„Британската одбранбена индустрија ќе ја ставиме во воен режим. Една од главните лекции од војната во Украина е дека ни се потребни подлабоки залихи на муниција, индустријата да биде во состојба побрзо да произведува“, рече Сунак за време на заедничката прес-конференција во Полска со генералниот секретар на НАТО, Јенс Столтенберг, пренесува Ројтерс.
Сунак предупреди на зголемување на опасноста по безбедноста во светот и додаде оти Британија не ја преценува проценката.
„Не сме на раб на војна, ниту ја посакуваме“, тврди Сунак.
Тој претходно предупреди дека рускиот претседател Владимир Путин „нема да запре на полската граница“, ако Русија победи во војната.
Велика Британија планира да испорача витална опрема за Украина, вклучувајќи 400 возила, 1.600 парчиња оружје, четири милиони парчиња муниција, како и дополнителни 500 милиони фунти за воено финансирање, со што вкупната вредност во оваа финансиска година ќе биде три милијарди фунти.