Претставничкиот дом на американскиот Конгрес со 360 гласа за и 58 против усвои закон кој предвидува забрана на социјалната платформа ТикТок, доколку нејзиниот сопственик, кинеската компанија „Бајтденс“ не го продаде своето право на работа на американскиот пазар во рок од девет месеци.
Платформата има околу 170 милиони корисници во САД, а одлуката е донесена затоа што американските безбедносни служби ја сметаат за ризик за националната безбедност. Дополнително ТикТок генерира и солидни приходи со што е сериозен играч во бизнисот со маркетингот на социјалните мрежи.
Во усвоениот закон е наведено дека „Бајтденс“ мора да најде купувач во рок од 270 дена, или платформата ќе биде забранета, а Белата куќа има можност да го продолжи тој рок за уште 90 дена, доколку претседателот Џо Бајден утврди дека има напредок во активностите за продажбата.
Кинеската компанија активно лобираше за да се спречи усвојувањето на законот, за кој рече дека ги крши правата на корисниците од Првиот амандман и ги загрозува малите бизниси.
„Жално е што Претставничкиот дом поддржува закон кој би ги погазил правата на слободата на говорот на 170 милиони Американци, ќе уништи седум милиони бизниси и ќе затвори платформа која придонесува со 24 милијарди долари годишно за американската економија“, соопшти компанијата на социјалната мрежа Х (Твитер).
Кинеската компанија најави дека може да го оспори законот на суд, а на корисниците им порача дека планираат да ја продолжат борбата „искористувајќи ги сите законски права“.
Од друга страна Кина или не дозволува користење или го ограничува пристапот и користењето на најголемите социјални мрежи во сопственост на компании од САД и од западните држави, поради можноста да не ограничуваат ширење на ставови спротивни на кинеските власти и политиките на Пекинг.
ТикТок е револуционерна социјална мрежа која стана популарна меѓу најмладите , но потоа се прошири и меѓу постарите генерации. Создаден е и пуштен во употреба во септември 2016-та.
Вертикалните видеа на ТикТок поради оригиналноста и популарноста беа преземени како медиумска содржина и од другите социјални мрежи. Рилсовите (reels) сега се најчесто употребуван формат за медиумска содржина на мрежите и воопшто на интернетот.