Здружението на дописници од Белата куќа ги повика новинарите кои патуваат со американскиот претседател Џо Бајден да престанат да крадат предмети од претседателскиот авион „Ер Форс 1“.
Пописот на инвентарот на претседателскиот авион по посетата на Бајден на Западниот брег во февруари, утврди дека недостасуваат повеќе работи од делот на авионот кој е наменет за новинари.
Меѓу „сувенирите“ кои ги земале новинари се брендирани навлаки за перници, чаши и позлатени чинии, пишува „Би-Би-Си“.
„Таквата кражба е забранета и се одразува лошо на новинарите кои патуваат со претседателот и мора да престане“, се наведува во соопштението на здружението.
Новинарите кои го следат американскиот претседател на патувањата, понекогаш како сувенири добиваат чоколада со лого и потпис на претседателот. Меѓутоа, земање на пешкири и прибор за јадење е вообичаена пракса која трае со години, велат новинарите.
Авионот „Ер Форс 1“ кој Белата куќа го нарекува и претседателска канцеларија на небо има 372 квадратни метри на три нивоа. На таа површина се сместени голем претседателски апартман, медицинска амбуланта со операциона маса, конференциска сала со трпезарија, две кујни за подготовка на храна во кои може да се подготват оброци за 100 луѓе, како и посебен дел за медиуми, ВИП личности, обезбедување и административен персонал.
Леталото се води како воен авион и опремено е да може да издржи напад од воздух од каде, исто така, може да се дополни со гориво што му овозможува да може да лета без престанување.
„Ер Форс 1“ е опремен со безбеден комуникациски систем, поради што може да послужи и како мобилен команден центар. Во него се наоѓаат 85 телефони, повеќе радио апарати и компјутерска врска.