Турскиот претседател Реџеп Таип Ердоган им понуди на Русија и на Украина мировни преговори во Турција. Неговата понуда стигна преку видео порака, емитувана на самитот „Украина-Југоисточна Европа“ во Тирана, нагласувајќи дека неговата земја е подготвена да биде домаќин.
Ердоган повика на заедничка работа за „утврдување на општите параметри на мирот“ и изјави дека, во оваа смисла, Анкара во принцип го поддржува мировниот предлог на Украина.
Тој потсети дека Турција помогна во спроведувањето на Црноморската иницијатива за жито, од која Русија се повлече во летото 2023 година.
Москва и Анкара претходно ја најавија посетата на рускиот претседател Владимир Путин на Турција. Посетата ќе се одржи по претседателските избори во Русија, закажани за 17 март.