Одговорот почна и ќе продолжи во време и на места кои САД ќе ги одберат, порача американскиот претседател Џо Бајден по одмазничките воздушни напади во Ирак и Сирија за убиството на тројцата американски војници и 40-тината повредени во минатата недела во Јордан. Мета на американските авиони беа седум локации со 85 цели кои се поврзуваат со Иранската револуционерна гарда и милициите блиски до неа.
Во пламен завршија командни и контролни штабови, разузнавачки центри, ракети, проектили и муниција, места за складирање на беспилотни летала и други објекти. Според ирачки официјални претставници загинаа најмалку 16 лица, а 25 се повредени. Жртви пријавија и сириските власти, без да прецизираат бројка.
„Попладнево, по моја насока, американските воени сили погодија цели на објекти во Ирак и Сирија кои Иранската револуционерна гарда и нејзините блиски милиции ги користат за напади врз американските сили. Нашиот одговор започна денес. Ќе продолжи во моменти и места по наш избор. САД не бараат конфликт на Блискиот Исток или на кое било друго место во светот. Но, нека го знаат ова сите оние кои би сакале да ни нанесат штета – ако му наштетите на Американец, ние ќе одговориме“, стои во изјавата на Бајден по најновите американски операции на Блискиот Исток.
Портпаролот на Советот за национална безбедност на САД, Џон Кирби ги оцени нападите како успешни и оти сите авиони се вратиле безбедно во базите.
Со реакција се јави и иранскиот претседател Ебрахим Раиси кој нагласи дека неговата земја нема да започне војна, но оти ќе одговори на секој кој ќе се обиде да ја малтретира. Во телевизиското обраќање до нацијата, тој додаде дека Техеран не е закана за ниту една држава во регионот. Кабинетот на ирачкиот премиер Мохамед ал Судани, пак, ги осуди американските напади кои ги нарече „нова агресија врз суверенитетот на Ирак“.
Сашко Димовски