Европскиот комесар за соседство и проширување Оливер Вархеји денеска реагираше на предлогот на претседателот на Европскиот совет Шарл Мишел дека ЕУ и земјите кандидати треба да бидат подготвени за проширување до 2030 година.
„Она што мислам е дека ако ова е порака од Советот, дека Советот сака конечно да се вклучи и да направи голем скок за да се случи проширувањето, ова е добредојдена вест“, им изјави Вархеји на новинарите во Толедо, каде што учествува на неформален состанок на министрите за надворешни работи на ЕУ (Гимних).
Тој додаде дека Комисијата отсекогаш била подготвена да го даде секој предлог што би довел до проширување.
„Не мислам дека станува збор за датуми. Мислам дека тоа е повеќе прашање на волја, а исто така и прашање на испорака; испорака од страна на ЕУ, но и испорака од страната на нашите партнерски земји од Западен Балкан или другите три земји кандидати“, рече комесарот.
Вархеји потсети дека Комисијата е подготвена да даде каков било предлог за да дојде до тоа, што ќе се види веќе во октомври кога ќе се дадат и суштински предлози вклучувајќи го и Планот за раст, кој претседателката Урсула фон дер Лајен веќе го објасни во Братислава.
„Ќе ја забрза не само институционалната, туку и вистинската интеграција. Вистинската интеграција на луѓето и економиите во Европската унија“, рече Вархеји.
На прашањето што треба да види од страната на Советот за тој датум од 2030 година да стане реалност, комесарот рече дека Советот треба „да продолжи со сите предлози што ги правиме и да ја донесе секоја одлука што можеме да ја донесеме: колку и да е мал, колку и да е голем“.