Жителите на карбинските селата Таринци и Нов Караорман вечерва организираа протест и не дозволија да се создаваат јами, во кои ќе се закопат заболени свињи од африканската свинска чума во фармата која е во близина на селото Таринци.
Градоначалникот на Општина Карбинци, Виктор Паунов вели дека според информациите станува збор за од 9.000 до 10.000 свињи, кои се одгледувале во најголемата фарма во овој регион. Посочува дека вечерва некој се обидувал да узурпира државно земјиште меѓу двете населени места, каде во непосредна близина е и индустриската зона.
Паунов вели дека според негови сознанија фирмата која со машина правела јами за угинатите свињи немала никакво одобрение, а стравувањето на населението е дека можат да се загадат подземните води, но и да влијае и врз нивното здравје. Околу 30 жители се собраа на локацијата, по што градежните машини запреле со работа. Паунов најави дека утре ќе има состаноци со надлежните инспектори за овој проблем.
Викторија Јованова