Дезинформацијата во основа неточно информира. Станува збор за грешка или незнаење на факти при претставување на определена вест или информација поради што содржината (веста) се пренесува неточно.
Дополнително, дезинформацијата често се произведува и со намера, определена информација да не не биде пренесена точно, туку свесно да се употреби со манипулација во толкувањето за да, пред се предизвика, насочување на јавното мислење по потреби на креатор на таа манипулативна дезинформација.
Многу често, како и лажните вести, дезинформациите се користат во пропаганда за определни политички или бизнис цели, како и за цели на определени интересни групи.
Дезинформацијата може како што е напоменато да биде свесно создадена со криење или извртување на факти или пак ненамерно да се објави поради незнаење на определени факти кои или не се познати и откриени до моментот на известување или пак не му биле познати на известувачот/новинарот/репортерот во време на известувањето.
Поради рапидниот раст на употребата на терминот „лажни вести“ и се пошироката дефиниција, дезинформацијата полека станува составен дел на пошироката дефиниција на „лажна вест“.
Како пример за дезинформација може да послужи пренесувањето на информацијата од грчките медиуми по насилниот инцидент пред фудбалскиот натпревар АЕК (Атина)- Динамо (Загреб) кога беше убиен еден грчки навивач. При апсење на хрватски навивач на граничен премин, грчките новинари објавија дека станува збор за осомничениот за убиството иако истрагата се уште не беше завршена во тој момент ниту беше познато кој е осомничен.
Конкретната дезинформација се потпира на факт (вистина) дека еден хрватски навивач е уапсен кој дополнително е надграден со неточна содржина дека е осомничен за убиство. Таков факт дотогаш ниту бил откриен ниту бил познат на известувачите но е пренесен или како ненамерна грешка или како манипулација.
Тука се доаѓа до главната разлика меѓу „лажна вест“ и „дезинформација’. Првото е измислена и искреирана содржина без факти додека втората се темели на факт, но е продлабочена со неточна содржина.
Ефектот и последиците и на двете се исти, предизвикуваат (главно како цел) поголемо внимание меѓу публиката за да ги доведе во заблуда, погрешно да го насочи јавното мислење, измами или штета врз нечиј углед.