Рускиот опозициски политичар Алексеј Навални е осуден на 19 години затвор по обвинението за екстремизам. Одлуката ја донесе судот во Русија кој го прогласи за виновен за формирање и за финансисрање на екстремистички организации и активности, пренесува „Би-Би-Си“. Навални, кој веќе служи деветгодишна затворска казна за прекршување на условната слобода, измама и непочитување на судот, ги отфрли обвинувањата.
Новите обвинувања против Навални се однесуваат на активности на неговата Фондација за борба против корупција и изјави на неговите највисоко позиционирани соработници, додава АП.
Руските власти во 2021 година забранија делување на фондациите и мрежите од канцеларии на Навални во руските региони, нарекувајќи ги екстремистички организации. Навални беше уапсен во јануари во 2021 година, по враќањето во Москва, откако во Германија се опоравуваше по труење со нервен агенс. За тоа го обвини Кремљ од каде негираа вмешаност во случајот.