Судирите меѓу израелската полиција и демонстрантите продолжија и во текот на ноќта ширум земјата, по усвојувањето на законските измени во судството. Дваесет и две лица беа уапсени синоќа на протестите во престолнината Тел Авив, каде полицијата употреби солзавец и водени топови за да ги растера демонстрантите.
Против измените што ги предложи владата на премиерот Бенјамин Нетанјаху, голем дел од граѓаните протестираат веќе седум месеци. Со нив се предвидува ограничување на овластувањата на Врховниот суд, со одземање на неговото право да укинува закони и владини одлуки за кои ќе одлучи дека се неразумни.
Владата тврди дека со тие измени се поправа грешка во самиот систем која го нарушува балансот во поделбата на власта, додека пак опонентите на измените обвинуваат дека со нив всушност се менува системот од демократски во авторитарен.
Опозицијата веднаш најави дека измените ќе ги оспори пред Врховниот суд додека резервистите во израелската армија и авијација порачаа дека ќе се јават на служба ако законските измени не бидат откажани.