Напукнат е еден од столбовите на мостот кај село Уланци во Општина Градско. Фотографијата до редакцијата на Телма ја испрати градоначалникот Кирчо Нацев на која се гледа напукнатиот столб, но и ѓубрето кое се фрлало во Вардар од Скопје, па сè до Градско.
РЦУК Велес изестува дека, заради долготрајните врнежи од дожд, нивото на реката Вардар е зголемено и во 7:30 часот се измерени 200 сантиметри, што е за 40 сантиметри повеќе од нормалното.
Во Брегалничкиот регион, водите кои надојдоа од браната Гратче над Кочани, направија излевање на Кочанска река. Поплавени се земјоделски површини, а поплавени се и дворови на куќи во селото Облешево.
Најголемата акумулација во источниот регион Калиманци е на пет сантиметри од прелевање, но според Богатинов во текот на попладневните часови и утре се очекува стабилизирање и намалување на нивоата на реките, како и дотокот на вода во Калиманци и Гратче.
Во Североисточниот регион, водата од поплавените земјоделски површини се враќа во коритото на Крива Река, а исто се намалува и во реката Пчиња. Мостотот на кој му е нарушена стабилноста е пуштен за сообраќај. Во Крива Паланка се санираат штетите од поплавите. Поради свлечиште, за сообраќај е затворен стариот пат кон манастирот „Свети Јоаким Осоговски“, атар на село Варовиште, а се работи на локалните делници кон селата Трново и Лукев.
Викторија Јованова