Претседателот на Србија Александар Вучиќ на инстаграм преку видео обраќање порача дека течат последните подготовки пред денешниот најавен голем собир во Белград. Тој во своето видео обраќање ги повика сите кои сакаат напредок за Србија, да дојдат на платото пред Народното собрание во 19 часот и заедно како што нагласи да се изборат за иднината на Србија.
Опозициските медиуми секојдневно информираат за притисоци врз вработените и врз сите останати граѓани да дојдат на контрамитингот на Српската напредна странка… Пишуваат дека за денешниот митинг подготвени се квоти, организирани се автобуси, а прогресивците масовно ги пребројуваат граѓаните и ги притискаат да дојдат на партиската „Средба на надежта“.
Претходно опозициските партии и невладините организации постојано го повикуваа Вучиќ да го откаже митингот, со оценка дека тој создава уште поголеми поделби во општеството, во чувствителен момент, по двете масовни убиства во кои животот го загубија 18 лица, а над 20 беа повредени..Во Србија претходните денови се одржаа масовни протести „Србија против насилството“, кои ги организираа опозициски партии… Нов таков митинг е закажан за утре.