Напнатата ситуација во српските општини Зубин Поток, Звечан и Лепосавиќ на северот од Косово која се создаде откако специјалните сили на косовската полиција и новоизбраните градоначалници во општините што Србите не ги признаваат, ескалираше попладнево кога дојде до судир меѓу собраните српски граѓани и полицијата во Звечан.
Се слушнаа и рафали, запалено беше полициско возило, а имаше фрлени и шок бомби. Припадниците на косовската полиција фрлија солзавец пред зградата на општината за да ги растера насобраните Срби, а некои медиуми јавуваат дека во Звечан одекнале и три детонации.
Подоцна, припадници на косовската полиција влегоа во зградата на општината, оставајќи зад себе на улицата огромно количество чад од солзавец и шок бомби. Оклопни возила и специјални полициски единици се сместени пред зградата на општината.
Сирени за тревога се огласија и во Косовска Митровица и во Лепосавиќ. И тука косовските Срби излегоа пред општинските згради кои беа чувани од косовската полиција, но и неколку оклопни возила. Српскиот претседател Вучиќ ја стави во борбена готовсност српската војска.
Од косовската полицијата соопштија дека само им помагаат на новоизбраните градоначалници да го остварат своето право на работа во официјалните општински згради.
Новоизбраните градоначалници во овие три мнозински српски општини положија заклетва на 25 мај, со што ја презедоа локалната власт на северот на Косово. Тие ги презедоа своите должности во јавни згради бидејќи во општинските згради, во кои се наоѓаат привремените општински тела кои работат во српскиот систем, не им беше дозволен пристапот.