Македонското Собрание денеска треба да почне со расправа по Предлог законот за борба против тешките облици на организиран криминал и висока корупција, што е поднесен од пратеникот Павле Трајанов.
„За првпат во Македонија се формира независна Агенција за борба против тешките облици на криминал, над која нема да има партиско и политичко влијание или влијание од носителите на високи политички и државни функции. Во законот се вградени системски решенија кои ја гарантираат самостојноста на Агенцијата при откривање и документирање на криминал со огромни димензии. Оваа Агенција треба да открива тешки облици на криминал, да поднесува кривични пријави, да предлага конфискација на имотот стекнат на криминален начин, како и да предлага забрана на политичко дејствување“, велат од Демократскиот сојуз (ДС).
Со Агенцијата, според предложеното законско решение, е предвидено да раководи директор кој ќе го избира тело од 12 лица со висок интегритет и резистентни на политички и коруптивни влијанија. Во Агенцијата ќе се ангажираат околу 40 врвни професионалци, со посебни права и овластувања, нагласуваат од ДС.
Законот е дел од проектот ДЕКРИ, по чиј урнек такви независни институции се формираа во БиХ, Србија, Хрватска, Словенија, Англија, Црна Гора и други држави.