Попладнево запреа сите возови во земјата. Вработените во Македонски Железници – Транспорт стапија во штрајк. Нема да го прекинат сè додека не ја добијат февруарската плата со покачување. Бараат веднаш да им биде исплатена втората половина од платата за минатиот месец, вредноста на бодот да се зголеми за 30 отсто, а кондуктерите да добијат надомест за ноќната работа.
Синдикатот на машиновозачите го актуелизира и барањето за вработување на 40 машиновозачи, бидејќи толку се потребни за редовно функционирање на железничкиот превоз. Штрајкот ќе трае до исполнување на нивните барања.
„Бојкотот ќе трае се до исполнување на барањата. И да пуштат плата денес, бојкотот ќе продолжи додека не бидат исполнети сите барања“, изјави Тони Димовски, претседател на машиновозачите и претставник на машинскиот и извршниот персонал на МЖ Транспорт.
Според Димовски, досега нема најави за средба со менаџментот на компанијата.