Борбата против корупцијата останува во фоусот на американската политика кон Македонија. Денес во Скопје беше глобалниот координатор за борба против корупцијата на американскиот Стејт департмент, Ричард Нефју на средба со претседателот Стево Пендаровски. Во кусото соопштение од Кабинетот на претседателот пишува дека се разговарало и за напорите на државата да воспостави ефикасен систем за превенција на корупцијата и судирот на интереси.
„Претседателот Пендаровски посочи на подготвеноста на државата да ја продолжи соработката со САД во напорите за сузбивање на корупцијата, а во функција на унапредување на демократските процеси во државата преку овозможување на добро управување и владеење на правото“, велат од Кабинетот на претседателот Стево Пендаровски.
Американската амбасадорка Анџела Агелер, која беше на средбата, изјави дека Нефју не е тука за да открива било какви имиња од американската црна листа на санкции, туку да се разговара за протоколите кои американската влада ги има во однос на борбата со корупцијата.
Тој е тука за да се дискутира за процесите, санкциите, протоколите кои владата на САД ги има по ова прашање. И како што кажав претходно оваа недела, ова е нешто на што продолжуваме да работиме во Вашингтон. Ние во амбасадата секојдневно сме вклучени во овој процес и имаме голем заговорник и сојузник во координаторот Нефју во борбата против корупцијата која знам дека е важна за секој граѓанин на оваа земја“, рече Анџела Агелер, амбасадорка на САД во Македонија.
Амбасадорката Агелер ја стави борбата против корупцијата, како еден од приоритетите за време на нејзиниот мандат. Таа неколку пати до сега предупреди дека тоа е клучно за напредок на државата, но кажа и дека тоа не е проблем кој може да се реши преку ноќ.
Марија Дивитарова