Прашањето за уставните измени лебди во политичката атмосфера: ниту може да се реализира, ниту да се отфрли засекогаш. Власта бара надпартиски консензус а опозицијата го смета за неприоритетно.
Министерот Бујар Османи во интервју за порталот „Рацин“ вели дека внесувањето на бугарското малцинство во Уставот е решение за идната комуникација меѓу двете заедници во земјава: мнозинскиот македонски народ и малцинската бугарска заедница. Уверен е дека има доволно аргументи за тоа.
Опозициската ВМРО-ДПМНЕ, без чии гласови не може ни да се отвори Уставот, смета дека ова прашање не е приоритет за граѓаните, но „неколку политичари на сила го форсираат мислејќи дека тоа ќе ги спаси нивните политички кариери“. Лидерот Христијан Мицкоски не е заинтересиран ниту за лидерска средба. Бара избори дури и без техничка Влада во последните 100 дена од мандатот на актуелната.
Власта сепак има намера да го конкретизира прашањето за уставните измени. Потпретседателот на СДСМ, Стефан Богоев, во интервју за Алсат, најави широка дебата во која ќе бидат вклучени пратеници, но и стручната фела, за да се конципираат уставните амандмани и да се објасни што ќе значи внесувањето на делови од бугарскиот, хрватскиот, црногорскиот и други народи. Богоев очекува таа дебата да заврши кон крајот на пролетта и почетокот на летото, односно, во мај во Собранието да се отвори ова прашање.
Но, дво-третинско мнозинство е потребно не само за изгласување на уставните амандмани туку и за носење првична одлука за менување на Уставот. Според распоредот на политичките сили во Собранието, тоа не е можно без гласовите на ВМРО-ДПМНЕ.
Соња Николовска