Борба со ветерници е чувството кое го имате при секое конкурирање и чекање на резултатите од Министерството за култура, вели писателката Билјана Црвенковска, која е воедно автор на повеќе книги за деца меѓу кои „Светот на Биби“, „Што сонуваше Дедо Мраз“ и многу други.
Во голем број случаи доделените средства за проектите не се доволни за да се реализира истиот. Со економската криза драстично се зголемија и цените на хартијата и печатењето.
„Кај литературата за деца е уште поголем проблем, затоа што таму ние имаме автор на делото, имаме илустратор кој што е најмен. Да речеме ние со авторот го избираме илустраторот и го повикуваме да ја сработи работата, значи тој мора да е платен соодветно за таа работа. И да не зборуваме колку чини печатењето на детските книги. Тоа е некогаш три пати повеќе од една обична книга, ако е таа книга роман, а ако е таа книга поезија може и четири пати повеќе да чини“ – вели Црвенковска.
Има повеќе аспекти кои нашите институции не ги разбираат во врска со издавачкиот сектор, а многу добро ги разбираат европските фондови, странските фондови, министерствата и агенциите во регионот, додава Црвенковска.
Во континуитет тензија без взаемна доверба е секоја комуникација со надлежното министерство, велат од Македонскиот центар при Интернационалниот театарски институт при УНЕСКО, чиј меѓународен проект „Зелена драматургија, Древни реплики“ со италијански и германски уметници е одбиен на годинашниот конкурс во рамките на интердисциплинарните проекти.
„Мене ми е прилично фрустрирачки, кај нас не постои професионална објективност. Една година ве поддржуваат следната не ве поддржуваат, а кога ќе ве поддржат тоа е толку смешна минимална сума и потребни се чуда за да го реализирате целиот замислен проект. Ние сме меѓународно признаени и навистина не ми е јасно што треба човек да направи дали треба да отиде во вселената за да ги исполни невозможните услови за континуирана поддршка на тоа што го работиме“ – тврди раководителката Иванка Апостолова од македонскиот центар ИТИ/ПРОДУКЦИЈА.
Струшките вечери на поезијата како еден од најреномираните светски поетски фестивали без сомнение дека заслужува поголема поддршка, вели Тасевски, сепак свесни сме дека се наоѓаме во една глобална и енергетска криза.
„Годинава добивме седум милиона и шесто илјади денари кои споредено со ланскиот ревидиран буџет сметаме дека со овие средства ќе обезбедиме достојно издание. И очекуваме кога ќе се надмине оваа криза буџетот да биде поголем“ – вели директорот на струшките вечери на поезијата, Тодорче Тасевски.
Секој апликант кој има забелешки на резултатите, против решението може да изјави жалба до Државната комисија за одлучување во управна постапка и постапка од работен однос во втор степен во рок од 15 дена од денот на приемот на решението, стои во дописот на Министерството за култура.
Нина Стефанова