Покрај министерските, на пазар се и директорските позиции во полицијата, УЈП, царината, инспекциите. Во сите овие институции, „Алијанса за Албанците“ бараат директорски или заменички позиции, за како што аргументираат, да се борат со корупцијата. Тоа отсега ќе биде главната тема на разговор на комисиите од двете партии, кои денеска ги почнуваат состаноците за кадровските смени.
Неофицијално, министерските позиции во Здравство и Правда, речиси, сигурно ги добиваат од „Алијанса“, а се калкулира со третото министерство кое ќе зависи од тоа дали „Алтернатива“ ќе останат во владата или не. Од оваа партија, освен министерко место, ќе треба да дадат и директорски позиции за нивните поранешни коалициони партнери, со кои не останаа во добри односи.
Доколку излезат од владата, министерството за информатичко општество ќе го земат „Алијанса“, ако не, тогаш се можни рокади и меѓу СДСМ и ДУИ. Но, тоа е сè помалку веројатно, особено по синоќешната изјава на претседателот на „Алтернатива“, кој го омекна ставот откако со денови демонстрираше отпор кон тоа, да отстапи позиции за новиот владин партнер.
„Кооперативни сме, немаме црвени линии за коалиционите партнери, ние сме за компромис и околу распределбата на ресорите“, изјави синоќа Гаши.
Од оваа партија чекаат да завршат преговорите меѓу СДСМ и „Алијанса“, по што ќе следува и покана и за повторна средба на Гаши со Ковачевски, која треба да финишира со конечен договор. Од СДСМ си дадоа подолг рок.
„Очекуваме до крајот на месецот да завршиме со преговорите и предлозите да влезат во собраниска процедура“, рече Дарко Каевски од СДСМ.
Новата влада ќе има 10 до 11 месеци за реализација на програмата, до редовните избори следната година.
Далиборка Демјанска Цветановска