„Алтернатива“ со своите четири пратеници нема доволно моќ да го спречи влезот на „Алијанса за Албанците“ во владата. Нивните некогашни коалициони партнери, кои имаат осум пратеници, се со една нога веќе на „Илинденска“, останува да се допрецизираат функциите што би ги добиле. Ова е оценката на албанските аналитичари по преговорите за засилување на мнозинството кои деновиве финишираа со средба на премиерот и Ахмети со Гаши.
Гаши одбива да отстапи некоја од министерските или директорските позиции за партијата за Таравари, но Незири смета дека не би имал храброст за нешто повеќе, иако е свесен дека ќе ја изгуби политичката моќ што ја има сега. Средбите со „огнената група“ од ДУИ, што резултираа со шпекулации дека нивните пратеници би можеле да се спојат во пратеничка група, ги оценува само како политички маневар.
И да влезат „Алијанса“ во владата, повторно ќе нема мнозинство за уставни измени, затоа што ќе ја поддржуваат 72-ца пратеници. Оттаму, нивниот интерес, да влезат во владата една година пред завршувањето на мандатот, аналитичарите го припишуваат на неуспехот од коалицирањето со ВМРО-ДПМНЕ. Единствена можност да дојдат на власт им е преку коалиција со партија од македонскиот блок, а тоа во случајов е СДСМ, на кои сега им се потребни за постабилно мнозинство.
Се очекува „Алијансата за Албанците“ да добијат две министерства, кои доколку Гаши не се предомисли, ќе треба да ги отстапат ДУИ и СДСМ. Но, деновиве и помалите коалициони партнери на Социјалдемократите реагираа дека, доколку СДСМ отстапи министерско место, не би била почитувана правичната застапеност.
Во актуелниот состав, од четворица вицепремиери, двајца се Албанци, а двајца Македонци, а иста е ситуацијата и со министрите. Од 16 министри, осум се Македонци, а осум Албанци.
Далиборка Демјанска Цветановска