Германија потврди дека ќе испрати тенкови „Леопард 2“ во Украина, по повеќенеделен притисок да го стори тоа. Канцеларот Олаф Шолц го најави тоа на состанокот со својот кабинет претпладнево, потврди портпаролот на сојузната влада, Штефен Хебештрајт, пренесува „Си-Ен-Ен“.
„Сојузната влада одлучи да ставо на располагање борбени тенкови „Леопард 2“ на располагање на украинските оружени сили. Ова е резултат на интензивните консултации со најблиските европски и меѓународни партнери на Германија. Оваа одлука ја следи нашата добро позната линија на поддршка на Украина, во рамки на нашите можности“, наведе Хебештрајт во соопштението.
Прашањето за испорака на тенкови „Леопард 2“ во Украина во изминатиот период предизвикаа поделби меѓу западните сојузници, членки на контакт групата за одбрана на Украина.
Ставот на Берлин беше главна пречка за испорака на тенкови „Леопард 2“ на состанокот на контакт групата во американската воздухопловна база „Рамштајн“ во Германија, на кој се собраа министри за одбрана и началници на генералштабови на војските членки на НАТО и партнерските земји.