Чувари или убијци на животната средина?! – Кој нѐ штити од загадување е отворено прашање, а институциите веќе се во потрага по одговорите. Кривично дело против природата – нотира Финансиката полиција за раководител од ресорот Екологија, затоа што лани „замижил“ пред законот. Без да направи увид во инсталација и нејзината работа, лично изработил и одобрил А-интегрирана еколошка дозвола на депонијата Дрисла, иако тие немале соодветна опрема за уништување на одредени видови опасен отпад.
„Во текот на 2021 година, во јавното претпријатие Дрисла бил примен и третиран 16.900 килограми опасен отпад од неколку правни субјекти, со што пријавениот сторил кривично дело Загадување на животната средина и природата согласно член 218 од Кривичниот законик. Притоа, наведениот правен субјект се стекнал со имотна корист во износ од 455.368 денари“, велат од Управата за финансиска полиција
Ова е само еден од низата случаи на класична корупција кај службеници и инспектори. Власта постојано најавува дека со реформи ќе се намалува корупцијата, а од Инспекцискиот совет тврдат дека целосно ќе се искорени. Но, и кога се водат дисциплински постапки против корумпирани службеници – епилог нема, а одговорност уште помалку.
„Согласно законот за административни службеници, рокот за покренување на дисциплинска постапка е три месеци и најчесто тие застаруваат“, истакна Даниела Рендевска, претседателка на Инспекцискиот совет, на почетокот на оваа недела.
Во случајов со раководниот државен службеник од Министерството за животна средина, покрај тоа тој што сторил кривично дело загадување на животната средина, ќе се гони и за искористување на својата службена положба. Со тоа, постапил спротивно на Законот за животна средина.
Петар Догов