Се пријави во трката за уставен судија, но не доби поддршка од владејачкото мнозинство во Комисијата за избори и именувања. Затоа, пак, екс обвинителот, Воислав Димовски денеска доби обвинение поради застарување на 14 предмети.
- Јавно обвинителство: Против Димовски беше отворена дисциплинска постапка, но тој на некој начин ги претекна и претходно побара сам да си замине од обвинителството. Советот на јавни обвинители пред два месеци му го прифати барањето и му констатираше престанок на функцијата.
Тој беше еден од шестмината кандидати за уставни судии предложени од ВМРО ДПМНЕ. Ниту еден не ја доби мнозинската поддршка, за разлика од предлозите на СДСМ, што предизвика револт кај опозицијата и одолговлекување на изборот со маратонски говори. Минатата недела, пратеничката Бети Стаменковска-Трајковска зборуваше цели десет часа, без да добие пауза од претседателката на Комисијата, која, пак, ја тестира нивната издржливост.
Со дискусијата, пратеничката Стаменковска постави и рекорд. Ова е првпат некој активно да дискутира 10 часа. Тактиката пред десетина години ја примени екс пратеникот Спиро Мавровски, кој цела ноќ на седница ја читаше владината програма, а познат е и случајот со актуелниот спикер, Талат Џафери, кој како пратеник на тогашната опозиција дискутираше повеќе часови, читаше поезија и повремено молчеше.
Далиборка Демјанска