Референдум за Договорот со Бугарија е недозволив. Ова е ставот на министерот за надворешни работи, кој денеска употреби и нов термин, еднонационален референдум, како аргумент плус за да се оспори каква било граѓанска иницијатива за ова прашање.
Рeферендум за Договорот со Бугарија не може и не смее да има. Еднонационален референдум за стратешки прашања за државата би биле опасен преседан, изјави Османи.
Од ВМРО-ДПМНЕ ќе поддржат чија било иницијатива за референдум против Договорот со Бугарија.
Ќе поддржиме иницијатива од кого било, а ко тоа помогне да се раскине овој штетен договор, изјави претседателот на ВМРО-ДПМНЕ,Христијан Мицкоски.
Додека го смислуваат референдумското прашање, од Левица му поднесоа кривична пријава на Џафери, за дело за кое се лежи и во затвор.
Пријавениот се терети дека, намерно и со умисла, преку противуставното, противзаконското и противделовничкото одбивање на уредната граѓанска иницијатива – поднесена од страна на група од 646 граѓани, на пропишаниот образец од страна на Државната изборна комисија – сторил тешко кривично дело против изборниот систем – „Спречување на избори и гласање“, казниво по чл. 158, ст. 1 од Кривичниот законик, со запретена минимална затворска казна од најмалку три години, стои во пријавата.
Засега се знае само дека новото референдумско прашање ќе биде во прашална форма и со изјаснување „против“. Не е исклучено, во него, покрај за Договорот со Бугарија, од граѓаните да се бара да се изјаснат и против францускиот предлог. Доколку биде одбиена и оваа иницијатива, опозицијата најавува целосна блокада на Собранието.
Далиборка Демјанска Цветановска