Комисијата за спречување и заштита од дискриминација утврди индиректна дискриминација од страна на МВР во случајот со 19-годишниот Мемет Камбер, момчето кое почина без лична карта и кое за државата до неговата смрт остана невидлив.
Неговата судбина остана заглавена во бирократијата на државниот апарат и едвај доби матичен број, но неможеше да извади лична карта и здравствена книшка за да може да се лекува.
Од Комисијата велат дека системскиот пропуст не е во Законот за лична карта туку во Законот за пријавување на живеалиштето и престојувалиштето на граѓаните каде изрично се наведува дека граѓанинот треба да наведи дали поседува стан или по некој законски основ престојува во некој стан.
Но проблемот настанува доколку некој граѓанин не поседува стан или не може да си дозволи живеалиште под закуп.
Комисијата сега дала препорака до Министерството за внатрешни работи во рок од три месеци да направи измени и дополнувања на Законот.
Велат дека тие не можат да понудат решение како да се стави крај на овој проблем бидејќи тоа не е во нивна надлежност но во нивното мислење е дадена компаративна анализа со примери од регионот како таму е регулирано ова прашање.
Мемет Камбер со години преку Дневниот центар за деца од улица учествуваше во програмата Лице в лице и како уличен колпортер ги продаваше изданијата на истоименото списание за одржлив развој по скопските улици пред се во Центар и во Карпош.
Сакал да извади и лична карта и здравствена книшка за да влезе во системот и да може да живее нормално. Но за личен документ му барале имотен лист за домот во кој живеел кај семејството на вујко му. А таков документ немало, бидејќи куќата била дивоградба.
Поради тоа сосема запрела постапката за издавање лична карта и преку тоа и за здравствената книшка.
Почина на 24-ти мај поради сериозни компликации предизвикани од неоткриен дијабет.Беше погребан 22 дена по смртта, а неговото тело остана три недели во капелата во Бутел поради бирократски процедури за утврдување на идентитетот на родителите.
Александар Петрески