Шпанската Влада ќе ја признае Палестина како независна држава пред почетокот на летото, соопшти премиеро Педро Санчез. Тој, сепак, нагласи дека ќе се обрати внимание и на одлуките кои ќе бидат донесени во Брисел и во САД, особено земјаќи ги предвид изборите за Белата куќа во ноември.
Санчез од вчера е турнеја по Блискиот исток. Синоќа пристигна во Јордан, по што ќе ги посети и Катар и Саудиска Арабија, во обид да влијае врз клучните актери во регионот за постигнување на одржливо решение за Газа.
Лидерите на Шпанија, на Малта, на Словенија и на Ирска претходно одобрија заедничка Декларација во која искажаа подготвеност да ја признаат Палестина, кога „таквиот потег може да даде позитивен придонес и кога околностите ќе одговараат“.
Шпанија го промовираше признавањето како „коалиција на доброволци“ поради острото противење на Германија и на Австрија, како и недостигот на поддршка од Италија и Франција.