Десет дена пред последниот рок за поднесување кандидатски листи за пратеници, се гледаат контурите на партиската коалициска изборна понуда.
Во понеделник се очекува ДУИ да објави раст на предизборната коалиција наречена Европски фронт. Ќе му се придружи некогаш лутиот политички противник ДПА, како што потврди Мендух Тачи за Клан Македонија, но и Европската демократска партија на Арјанит Хоџа.
Пред неколку дена, веќе се потпишаа и се ракуваа Али Ахмети и Скендер Реџепи Зејд од Народното движење. Последните два коалициски партнери на ДУИ се формираа во последните 7 месеци, отцепувајќи се од Беса и од Алтернатива.
Најнеизвесно останува позиционирањето на делот од Алијанса предводен од Зијадин Села. ДУИ му чува добитни пратенички места ако се придружи во Европскиот фронт, а Таравари го повикува да не се компромитира. Му ветува и потпис на кандидатските листи ако се определи за самостоен настап бидејќи нема судска одлука чија Алијанса е онаа вистинската.
-Ние сега сме „Вреди“. Нашата група има мнозинство и во Централното претседателство и во Централното Собрание. Не би сакал тие да одат со ДУИ. Тоа ќе го погоди секој член и секој гласач на Алијансата. Не сакам да се искомпромитираат до крај. Сакам да им помогнам, изјави претседателот на Алијанса за Албанците, Зиадин Села.
ВМРО ДПМНЕ сака да прикаже дека се зголемува бројот на нивните коалициски партнери, но не е подготвена да им отстапи добитни пратенички места на кандидатските листи. Или, како што вели Павле Трајанов, „ВМРО-ДПМНЕ изградиле став да имаат хомогена пратеничка група“.
Ова е една од разликите што се обидуваат да ги надминат. Во разговорите, Демократскиот сојуз ги истакнува своите приоритети: нов Устав, зајакнување на унитарната држава, укинување на Бадинтер и на Балансерот, реформа на правосудниот систем идр.
-Разговараме првенствено со ВМРО-ДПМНЕ за овие врвни приоритети. Тука во основа сме компатибилни како политички партии со свои програмски определби и цели. Има некои отворени прашања за кои имаме разлики. За нив ќе разговараме на Централниот совет. Очекувам да добиеме поддршка јас како претседател и Централното претседателство за да ја продолжиме оваа соработка со ВМРО-ДПМНЕ, рече претседателот на Демократскиот сојуз, Павле Трајанов.
ВМРО-ДПМНЕ ја комплетираше листата на носители. Шесте адути на партијата се: претседателот Христијан Мицкоски, потпретседателите Александар Николоски и Владо Мисајловски, генералниот секретар Ѓорѓија Сајкоски и пратениците Драган Ковачки и Дафина Стојаноска. Наредната недела ќе се објават имињата на сите 120 кандидати и ќе се потпише договор со коалициските партнери. Дали меѓу нив ќе биде Достоинство – партијата на Стојанче Ангелов дополнително ќе одлучува, откако формално ќе излезе од сојузот со СДСМ.
Соња Николовска