Ако сакаме да ги сочуваме слободата и суверенитетот, мора да го заземеме Брисел, порача унгарскиот премиер Виктор Орбан на свеченост во Будимпешта по повод 15 март, национален празник за борбата на унгарскиот народ за слобода и независност во 1848 година.
Тој во говорот истакна дека ќе направи промени во Брисел и оти Унгарија не е сама во тоа.
Унгарскиот премиер нагласи оти Унгарија не прифаќа тоа што, како што вели, „Брисел се сврте против луѓето, дека ги турка децата во должничко ропство и ги води луѓето во војна“.
„Сакаат да нè принудат на војна, сакаат да ни закачат мигранти на врат и да ги превоспитуваат нашите деца. Но, ние не сакаме во војна, нема да пуштиме мигранти во Унгарија и не ги даваме нашите деца. Тоа е јасно како ден. Унгарија е слободна и суверена земја и таква ќе остане“, порача Орбан.