За една година се пополнети една третина од испразнети места во штипската Клиничка болница. Во тек е нов оглас за вработување на 15 лекари, болничари хигиеничари и три лица технички персонал.
Ова е втор оглас, со што во оваа болница за една година ќе се вработат вкупно 34 лекари, медицински сестри, болничари, хигиеничари и технички персонал. Но, за регионалниот болнички центар на истокот и понатаму проблем е недостатокот од вработени, на почетокот на годината имаше над 100 испразнети работни места.
Во штипската Клиничка болница медицински сестри и помошен технички персонал недостасуваат на сите одделенија, а лекарски кадар на одделенијата за анестезиологија, ортопедија и очно. Вработените и пациентите се уште се лекуваат во стариот објект на болницата.
Новата болница се гради речиси осум години, во јули годинава беше раскинат договорот со грчката фирма, а ресорниот министер деновиве најави дека нова тендерска постапка за доградба на оваа болница ќе се распише до Нова година или почетокот на наредната.
Според идејниот проект болницата е со површина од 34. 000 м2, на пет каскадно поврзани нивоа. За градежните работи и ентериерно уредување со целата потребна медицинска опрема планирана беше инвестиција од 46 милиони евра.
Викторија Димитрова Јованова