Седмиот член на ДИК веројатно ќе се бира по Нова Година. Во наредните две недели, неизвесно е дали Комисијата за избори и именувања ќе стигне да испрати извештај до спикерот Талат Џафери, по што тој ќе има три дена за консултации со партиите и за ставање на точката на дневен ред.
Премиерот Ковачевски ги повика пратениците да си ја завршат оваа обврска и да не прават импровизации кои може да стават дамка на изборниот процес.
И ДУИ апелира изборот на член на ДИК да не се претвори од техничко во дневно-политичко прашање. Синоќа на ТВ 21, потпретседателот на ДУИ Арбр Адеми повика на дијалог, „без разлика кое ќе биде името што ќе го предложи опозицијата“. И покрај тоа, Европскиот сојуз за промени се сомнева дека власта ќе одолговлекува и ќе изнаоѓа креативни решенија за да ја остави ДИК со шест члена. Ја посочува вчерашната седница на Комисијата за избори и именувања, кога беше оспорено правото на Абдуш Демири да се кандидира и не е земено предвид дека тој повеќе не е член на партиските органи.
ДИК треба да има седум члена. Четворица се бираат по предлог од владеачките партии, а тројца од опозициските. Во моментот, има тројца предложени од СДСМ, двајца од ВМРО ДПМНЕ, 1 од ДУИ и 1 празно столче. Го испразни Кренар Лога кога стана министер. Алијанса настојува да го задржи, а Европскиот сојуз го бара како втора опозициска партија во овој момент.
Соња Николовска