Хамас е подготвен за продолжување на примирјето во Газа за дополнителни четири дена, изјави извор близок со палестинската милитантна група за Агенцијата Франс Прес.Тој додава оти движењето е подготвено да ослободување на израелски лица кои се заложници на други групи на отпорот во енклавата во рамки на постоечкиот договор за прекин на огнот.
Поддршка за продолжување на паузата за борбени дејства изразија министрите за надворешни работи на земјите членки на групата Г7, како и Европската Унија.
Вкупниот број на заложници кои досега ги ослободи Хамас е 81, додека Израел пушти на слобода 180 Палестинци од затворите. Според условите во договорот, прекинот на огнот може да се продолжи за повеќе денови, до вкупно 10, ако секој ден Хамас ослободува по најмалку 10 заложници, при што Израел би пуштал повеќе затвореници според договорот „три за еден“.
Продолженото примирје за размена на израелски заложници за палестински затвореници истекува утро изутрина.
Израелските одбранбени сили, пак, утрово со ново предупредување до сите Палестинци да не се движат кон северниот дел на Газа и покрај примирјето, со образложение дека тој дел го сметаат за воена зона. Израелската страна притоа наггласи оти е забрането приближување до границата на помалку од еден и пол километар, како и влегување во море.
Палестински медиуми објавија дека во текот на ноќта дошло до судир меѓу палестински вооружени напаѓачи и израелски единици во градот Џенин на северот на Западниот брег. Во тек е израелска рација, а медиумски извештаи се однесуваат и на едно повредено момче по употребата на куршуми за предупредување, шок бомби и солзавец.
Сашко Димовски