Го нарекуваат холандскиот Доналд Трамп. Исламските екстремисти му се закануваа со смрт безброј пати, а Британија еднаш му забрани да влезе во земјата.
Сега Герт Вилдерс освои огромна победа на изборите во Холандија и е во пол-позиција да ја формира следната владејачка коалиција и веројатно да стане следниот премиер на Холандија.
Антиисламскиот популистички лидер Герт Вилдерс извојува драматична победа на општите избори во Холандија, по речиси сите пребројани гласови.
По 25 години во парламентот, неговата партија Слобода (ПВВ) треба да освои 37 места, далеку пред неговиот најблизок ривал, левичарскиот сојуз.
„ПВВ повеќе не може да се игнорира. Ние ќе владееме“, рече тој.
Неговата победа ја потресе холандската политика, а ќе предизвика и шок низ Европа.
Но, за да го исполни своето ветување да биде „премиер за сите“, тој ќе мора да ги убеди другите партии да му се придружат во коалиција. Неговата цел е 76 места во 150-члениот парламент.
60-годишниот Вилдерс ја искористи широко распространета фрустрација од напливот на мигранти, ветувајќи „затворени граници“, а го одложи ветувањето дека ќе го забрани Куранот.
Пред гласањето, трите други големи партии ја отфрлија можноста за учество во владата предводена од Вилдерс поради неговата екстремно десничарска политика. Но, тоа може да се промени поради обемот на неговата победа.
Левичарската алијанса под водство на поранешниот еврокомесар Франс Тимерманс се позиционираше на далечно второ место со освоени 25 места во парламентот.
Тој јасно стави до знаење дека нема да има никаква врска со владата предводена од Вилдерс, ветувајќи дека ќе ја брани холандската демократија и владеење на правото.
„Нема да дозволиме никого во Холандија да си оди. Во Холандија сите се еднакви“, им рече тој на поддржувачите.