Нема проширување на Европската Унија без укинување на принципот на едногласност при носење на одлуките, сметаат авторите на извештајот кој беше усвоен денеска во Европскиот парламент. Пет претставници – по еден од либералите, „зелените“, социјалистите, левицата и народната партија (четворица Германци и Холанѓанец), како автори на извештајот, предлагаат измени на европските договори, меѓу другото за укинување на едногласноста при донесување на одлуките, зајакнување на законодавните овластувања на Европскиот парламент и воспоставување на енергетска и одбранбена унија. Документот беше усвоен со 291 глас „за“ и 274 „против“.
„Светот драматично се промен и од Лисабонскиот договор“, рече либералот Гај Верхофштад во дебата на пленарната седница во Стразбур, предупредувајќи дека ваква ЕУ не е подготвена на „бруталниот свет“, ниту за проширување.
„Реагираме премалку или предоцна, бидејќи сме парализирани со едногласно носење на одлуките“, изјави поранешнјиот белгиски премиер кој тврди дека правото на вето и уцени се „стандардна пракса во ЕУ“.
Европскиот совет одлучува едногласно, а Советот на ЕУ го користи тоа начело при носење на одлуки за низа чувствителни прашања, како надворешната и безбедносна политика, финансиите, делови од одредбата за правосудство и внатрешни работи, членството во ЕУ, итн.
Верхофштад и колегите предлагаат создавање на „засилено“ квалифицирано мнозинство со кое одлуки би носеле две третини од земјите членки кои претставуваат над 50 отсто од населението во Унијата. Со тоа, според него, „драматично би се подобрил“ статусот на „малите и средно големи членки“.