Поранешниот претседател на Финска и добитник на Нобеловата награда за мир, Марти Ахтисари почина во 86 година од животот. Ахтисари учествуваше во решавање на војната на Косово и во конфликтите во Северна Ирска и во Индонезија.
Ахтисари е роден во 1937 година во Виипури кој денеска е дел од Русија, а неговото семејство беше принудено да се исели по инвазијата на советските сили. Глобално беше познат како мировен посредник, во Финска беше политички аутсајдер.
Но, токму тоа што не беше политички вмрежен во неговата земја, му помогна да победи на првите директни претседателски избори во Финска во 1994 година, како дел од опозициските социјалдемократи. Како претседател беше „за“ членство на Финска во Европската Унија и ги поттикнуваше гласачите да го поддржат референдумот за пристапување во 1994 година кој мина со 57 отсто поддршка.
Ахтисари одбиваше да прифати дека конфликтите и војните се неизбежни. Беше познат по својата подготвеност да разговара со сите страни и способноста за трпеливо чекање на вистинскиот момент за компромис.