Египетскиот министер за надворешни работи, Самех Шукри рече дека израелската влада засега не дозволува отворање на граничниот премин Рафа, единствениот од Газа кон Египет.
„Израелската влада сè уште не зазела став за отворање на граничниот премин меѓу Египет и Газа. Египет сакаше од почеток на војната да го држи оперативен преминот Рафа“, истакна Шукри.
Тој ја оцени како опасна ситуацијата со која се соочува палестинскиот народ, пренесува „Ројтерс“.
Британската агенција, повикувајќи се на неименувани безбедносни извори во Египет, претходно објави дека Израел, во соработка со САД и Египет се согласил на прекин на огнот на југот на Газа на неколку часа, со цел да може да се достави хуманитарна помош и да извлечат странците од Појасот. Меѓутоа, Израел нешто подоцна ја демантираше таквата вест.