Откако владата и пратениците не реагираа на бројните реакции и не си ги намалија платите, синдикатите ги земаа работите во свои раце. Денеска поднесоа до сите пратенички групи предлог за намалување на платите на функционерите за 78 отсто. Бараат итни измени на член 11 од Законот за плата и другите надоместоци на пратениците во Собранието и другите избрани и именувани лица во државата.
Ниту еден пратеник од позиција или опозиција не поднесе барање за измена на овој закон, затоа решивме ние, по бурните реакции што ги имавме дека треба да се врати пресметковната вредност на минималната плата, вели Трпе Деановски од УПОЗ.
Синдикалците се надеваат дека ќе им биде излезено во пресрет на барањето.
Мислиме дека ќе се најде некој херој меѓу пратениците кој ќе го прифати нашето барање, вели Деановски.
Сепак, ниту пратениците, а ни претседателот на собранието денеска не сакаа да го коментираат барањето. Џафери не дозволи прашање надвор од темата уставни измени, а пратениците велат дека се на одмор и за ова ќе с еизјаснат кога ќе се вратат и ќе го видат предлогот.
Одморот им е продолжен до последната недела на август, а првата наредна седница ќе биде закажана за 5-ти септември.
Далиборка Демјанска