Тетово отсекогаш имал прволигаши, дури и во Југославија, а во еден момент во македонската прва лига имаше дури три прволигашки тимови. Најфудбалскиот град во државата сега има два стадиона и еден прволигаш, но најспорното е што општината одлучи на стадионите да игра само Шкендија во Прва лига, а нисколигашите Тетекс и Љуботен и женскиот тим на Љуботен, општината ги испрати да играат и да тренираат на синтетичка трева, на терен изграден од Агенцијата за млади и спорт. Граѓаните сметаат дека фудбал треба да се игра на стадиони, а не на игралишта и поделбата да не се прави по лигашки статус.
Од друга страна, клубот Тетекс, пак, препознава етнички клуч во одлуката Шкендија да остане и да игра на стадионот во Тетово, а Тетекс и Љуботен да бидат исклучени од таа можност. Тетекс се заблагодари на поддршката која добиваат во јавноста и тврдат дека иако имало обиди, договор со општината не е постигнат. Сега Тетекс ќе има простории на стадионот, но не и пристап до зелениот терен.
„Се запрашуваме, дали во 21-от век е нормално само поради тоа што сме Македонци кои живеат во Општина Тетово да немаме право на тренинзи на природна трева? – Низ историјата, без никакви проблеми, со меѓусебна координација, сите клубови тренирале и ги играле своите натпревари на овие два стадиона. Денеска, наместо да се работи на што поголема кохезија, кога е спортот во прашање, очигледно некои работат на тоа македонските клубови да се дестабилизираат и дефоксуираат од целта“, се вели во соопштението на ФК Тетекс.
Општината, пак, тврди дека изборот е донесен врз основа на квалитет и лигашки статус и секогаш постапувале одговорно кога е по прашање соживотот. Од општината велат дека така било и договорено со клубовите кои сега се бунат.
„Средба со претставници на клубовите имаше и се постигна јасен консензус. Градскиот стадион да се користи само за фудбалски натпревари во Првата лига на Северна Македонија и меѓународни фудбалски натпревари, но и за натпревари од особено значење, како на пример полуфинале и финале во Купот на Македонија. За екипите кои настапуваат во пониските лиги, општината има јасен став: ќе се уредат и други терени опремени со сите потребни услови за спортски натпревари“, соопштуваат од Општина Тетово.
Општината најавува модернизација на градскиот стадион, но исто така ветува дека ќе вложува и во игралишта за сите клубови во пониски лиги. Но, клубовите Тетекс и Љуботен не отстапуваат и бараат веднаш да им биде овозможено да играат и тренираат на тетовските стадиони.
Миомир Серафиновиќ