Државата не ќари денар од запленетите акции на Мијалков кои се продаваа шест дена, од македонска Берза велат немало интерес

Државата не инкасираше ниту еден денар од запленетите акции на Сашо Мијалков кои беа ставени на аукција на македонската берза по оглас и налог на агенцијата за запленет имот. Акциите кои се запленети во случајот „Империја“ беа на продажба шест дена, но никој не покажал интерес, велат од македонската берза.

Во случајот „Империја“, поранешниот директор на УБК, Сашо Мијалков призна вина и се спогоди со обвинителството, а казната беше три години затвор и одземање на имот вреден околу 30 милиони евра, меѓу кои 25 станови и парцелата до хотелот „Мериот“. Шесте милиони евра готовина, што Мијалков ги уплати, по признанието вина во истоимениот предмет, владата веќе ги троши.